صدرمملکت آصف علی زرداری نے مدارس رجسٹریشن کا بل اعتراض لگاکر واپس بھجوادیا جس کے بعد وفاقی حکومت کی جانب سے آئندہ ہفتے قومی اسمبلی کا اجلاس بلائے جانے کا امکان ہے۔

واضح رہے کہ جے یو آئی کے سربراہ مولانا فضل الرحمان نے چیئرمین پی پی بلاول بھٹو سے ملاقات میں مدارس رجسٹریشن بل پر صدرکے دستخط نہ کرنے پر تحفظات کا اظہار کیا تھا۔

اس حوالے سے ذرائع نے بتایا کہ حکومتی حلقوں میں پارلیمنٹ کا مشترکہ اجلاس بھی بلانے پر غور جاری ہے اور مشترکہ اجلاس میں مدارس بل پر بھی بحث کی جائے گی۔

اجلاس میں مدارس رجسٹریشن بل جو 26 ویں آئینی ترمیم کے موقع پر دونوں ایوانوں نے منظور کیا تھا، صدر مملکت نے بل پر دستخط کیے بغیر واپس بھجوایا۔

ذرائع کے مطابق از سرِنو منظوری کے لیے پارلیمنٹ کا مشترکہ اجلاس بلانا ضروری ہے، مجوزہ قومی اسمبلی کے اجلاس میں بھی اہم قانون سازی زیر غور آسکتی ہے۔