مظفرآباد میں محبت کی شادی کیلئے اپنی جان کو خطرے میں ڈال کر کنٹرول لائن عبور کر کے مقبوضہ کشمیر سے آزاد کشمیر آنے والی لڑکی اور اس کے محبوب عمران کی درخواست ضمانت منظور یا مسترد کرنے پر سول عدالت حویلی آج فیصلہ سنائے گی۔

سول جج حویلی نے درخواست ضمانت پر مزید کارروائی کل ملتوی کی تھی جس کی سماعت آج ہوگی۔ جوڈیشل لاک اپ میں رہائی کے منتظر پریمی جوڑے فاطمہ اور عمران کو رہائی نہ مل سکی۔

اپنے بھائی کے دوست عمران سے محبت کی شادی کرنے کیلئے 24 نومبر کو مقبوضہ کشمیر کے علاقہ کرنی کی رہائشی دوشیزہ فاطمہ نے کنٹرول لائن عبور کرکے آزاد کشمیر ضلع حویلی کے رہائشی عمران کے گھر پناہ لی۔

پولیس نے عمران اور فاطمہ کو گرفتار کر کے حوالات میں بند کر رکھا ہے۔

ذرائع کے مطابق سول عدالت حویلی درخواست ضمانت منظور یا مسترد کرنے سے متعلق فیصلہ آج سنائے گی۔

گرفتار لڑکی نے پولیس کو بتایا کہ کنٹرول لائن عبور کرنے کے بعد عمران، جو اس کے بھائی کے ساتھ بیرون ملک ملازمت کرتا ہے، اسے اپنے گھر لے آیا۔ فاطمہ نے کہا کہ وہ اکثر عمران سے فون پر بات کرتی رہتی تھی۔