مقبوضہ کشمیر سے لائن آف کنٹرول (ایل او سی) عبور کرکے آزاد کشمیر پہنچنے والی لڑکی فاطمہ کو پولیس نے گرفتار کر لیا ہے۔ پولیس کے مطابق، یہ واقعہ گاؤں کیرنی میں پیش آیا، جہاں فاطمہ کی موجودگی کی اطلاع ملنے پر کہوٹہ پولیس نے کارروائی کی۔

فاطمہ نے 24 نومبر کو آزاد کشمیر کے ایک لڑکے کی جانب سے شادی کے وعدے پر کنٹرول لائن عبور کی اور پونچھ پہنچ گئی۔ گرفتار لڑکی نے پولیس کو بتایا کہ کنٹرول لائن عبور کرنے کے بعد عمران، جو اس کے بھائی کے ساتھ بیرون ملک ملازمت کرتا ہے، اسے اپنے گھر لے آیا۔ فاطمہ نے کہا کہ وہ اکثر عمران سے فون پر بات کرتی رہتی تھی۔

پولیس نے فاطمہ کے ساتھ مقامی نوجوان عمران کو بھی گرفتار کر لیا ہے۔ عمران پر کنٹرول لائن عبور کرانے اور لڑکی کو والدین کی مرضی کے خلاف شادی پر اکسانے کا الزام عائد کیا گیا ہے۔

دونوں کی رہائی اور حوالگی کے لیے اہلخانہ نے مجسٹریٹ کے پاس درخواست دائر کر دی ہے۔