خیبرپختونخوا حکومت کی جانب سے نو مئی تحقیقات کیلئے جوڈیشل کمیشن کے قیام کا خط پشاور ہائیکورٹ کو موصول ہوگیا ہے۔

ایڈووکیٹ جنرل نے پشاور ہائیکورٹ کے چیف جسٹس اشتیاق ابراہیم کو خط لکھا تھا، جس میں جوڈیشل کمیشن کیلئے جج مقرر کرنے کی درخواست کی گئی تھی۔

صوبائی وزیرِ قانون آفتاب عالم نے خط بھیجنے کی تصدیق کرتے ہوئے کہا تھا کہ عدالت کو سمری ارسال کرنے سے متعلق کابینہ پہلے ہی منظوری دے چکی تھی۔

ان کا کہنا تھا کہ نو مئی واقعات سے متعلق جوڈیشل کمیشن کے قیام کیلئے چیف جسٹس کو سمری بھیجی گئی ہے۔

انہوں نے مزید کہا کہ اس سمری میں نو مئی کے واقعات کی تحقیقات کے لیے جوڈیشل کمیشن کے قیام کی استدعا کی گئی ہے جب کہ اس میں چیف جسٹس سے کمیشن کیلئے ناموں کے اعلان کا استدعا کی گئی ہے، جس میں کمیشن کا سربراہ پشاور ہائی کورٹ کا کوئی جج ہوگا۔

ذرائع کے مطابق صوبائی حکومت کے خط پر مشاورت ہوگی۔

صوبائی کابینہ نے 27 جون کو 9 مئی تحقیقات کے لیے جوڈیشل کمیشن کی منظوری دی تھی۔