پشاور ہائیکورٹ نے میڈیکل کالجز میں ضم اضلاع کے لیے مختص سیٹوں کی پالیسی کو قانونی قرار دے دیا اور ضم اضلاع کے طلباء کی درخواست خارج کردی۔

ضم اضلاع سے تعلق رکھنے والے طلباء نے پشاور ہائیکورٹ میں درخواست دائر کی تھی کہ میڈیکل کالجز میں ضم اضلاع کے لیے مختص سیٹوں کے پالیسی کو غیرقانونی قرار دے کر ضم اضلاع کے طلباء کو بھی اوپن میرٹ پر داخلے کی اجازت دی جائے۔

پشاور ہائیکورٹ کے جسٹس عتیق شاہ اور جسٹس ارشد علی نے درخواست پر سماعت کی تھی جس کا تحریری فیصلہ جاری کردیا گیا۔

جسٹس ارشد علی کی جانب سے تحریر کیے گئے فیصلے میں لکھا گیا کہ ضم اضلاع کے طلباء کے لیے سیٹیں مختص ہیں، اس لیے اوپن میرٹ پر داخلہ نہیں لے سکتے اور اسی بندوبستی علاقوں کے طلباء مخصوص سیٹوں پر داخلہ نہیں لے سکتے۔

عدالت نے خیبر میڈیکل یونیورسٹی کی داخلہ پالیسی کو قانونی قرار دے کر طلباء کی درخواست خارج کردی۔