گلگت بلتستان حکومت کے ترجمان فیض اللہ فراق کا کہنا ہے کہ جمعرات کی شام مین روڈ اور بابوسر ناران ہائی وے سے دور ایک علاقے میں سیکورٹی آپریشن کے بعد شاہراہ قراقرم پر ٹریفک معمول کے مطابق ہے۔

اپنے ایک بیان میں فیض اللہ فراق نے کہا کہ سانحہ ہدر کے ایک ملزم کی گرفتاری کے لیے علاقے میں چھاپے کے دوران سیکیورٹی فورسز کے ساتھ فائرنگ کے تبادلے میں ایک ”ہائی پروفائل“ دہشت گرد مارا گیا۔

خیال رہے کہ جی بی کے ضلع دیامر میں دو دسمبر کو مسافر بس پر فائرنگ کے نتیجے میں کم از کم 8 افراد جاں بحق اور 26 زخمی ہوئے تھے۔

دیامیر میں چلاس کے علاقے ہدر پاری پوائنٹ پر نامعلوم مسلح افراد نے مسافر بس پر فائرنگ کی جس کے نتیجے میں 8 افراد موقع پر ہی جاں بحق ہوگئے۔

ایک سرکاری ذرائع نے بتایا کہ جاں بحق افراد میں دو فوجی بھی شامل تھے، جو چھٹیوں پر اپنے آبائی علاقوں کو جا رہے تھے۔

گلگت بلتستان حکومت کے ترجمان نے واضح کیا کہ مرکزی سڑکیں سرکاری طور پر بند نہیں کی گئی ہیں اور ٹریفک معمول کے مطابق رواں دواں ہے۔

انہوں نے کہا کہ ’ہدر واقعے سے منسلک ایک مشتبہ شخص کو پکڑنے کے لیے قراقرم ہائی وے اور بابوسر ناران روڈ سے دور ایک ٹارگٹڈ آپریشن کیا گیا۔ اس آپریشن کے نتیجے میں فائرنگ کا تبادلہ ہوا، اور اس واقعے میں ملوث اہم کمانڈر مارا گیا۔‘

ان کا کہنا تھا کہ ’صورتحال اب معمول پر آ گئی ہے اور بڑے پیمانے پر کوئی کارروائیاں جاری نہیں ہیں۔ زندگی معمول پر آگئی ہے اور سیکورٹی کا دائرہ بڑھا دیا گیا ہے‘۔