سنیر صوبائی وزیر مریم اورنگزیب کی ہدایت پر محکمہ وائلڈ لائف نے سرگودھا میں کارروائی کرتے ہوئے 50 افراد کے خلاف مقدمہ درج کرلیا۔

سرگودھا کے نواحی علاقے نہنگ میں عید کے موقع پر سور اور کتوں کی غیر قانونی لڑائی کا سرعام انعقاد کیا گای تھا اور پولیس اور محکمہ وائلڈ لائف خاموش تماشائی بنے ہوئے تھے، لڑائی دیکھنے کے لیے تماشائیوں کی بڑی تعداد موجود تھی۔

تھانہ ترکھانوالہ کی حدود میں ہونے والی اس لڑائی کی طرف سے پولیس نے آنکھیں بند کرلیں، محکمہ وائلڈ لائف بھی خاموش تماشائی بن کر رہ گیا۔

غیر انسانی اور غیر قانونی کھیل میں سور شکاری کتوں کے کاٹنے سے شدید زخمی ہو گئے۔

خبر سامنے آںے پر مریم اورنگزیب کی ہدایت کے بعد ڈی جی وائلڈ لائف نے کتوں اور سور کی لڑائی کروانے کے کھیل کی خبر کا سخت نوٹس لیا اور کھیل کو منعقد کروانے والوں کے خلاف سخت کارروائی کی ہدایت کی۔

جس کے بعد کتوں اور سور کی لڑائی کروانے والے پچاس افراد کے خلاف مقدمہ درج کروایا گیا اور سوری شانکڈر پولیس نے ایک درجن سے زائد افراد کو حراست میں لے لیا، باقی افراد کی گرفتاری کے لیے پولیس کی چھاپہ مار ٹیمیں متحرک ہیں۔

ڈی جی وائلڈ لائف پنجاب کا کہنا ہے کہ صوبہ بھر میں جانوروں کو مقید کرنے اور ان کی لڑائی کروانے پر کومبنگ آپریشن کا آغاز کیا ہوا ہے، وائلڈ لائف ایکٹ کے شیڈول 3 کے تحت غیر قانونی جانوروں کو مقید رکھنا ایک جرم ہے، ان کو آپس میں لڑانا بھی خلاف قانون ہے، خلاف ورزی کو سختی سے نمٹا جائے گا۔

ان کا کہنا تھا کہ صوبہ بھر میں سرویلنس ٹیمیں کاروائی کر رہی ہیں۔