وفاقی کابینہ نے 24 افراد کے نام ایگزٹ کنٹرول لسٹ (ای سی ایل) میں ڈالنے اور پی ٹی آئی رہنما بابراعوان سمیت 22 مخلتف شخصیات کے نام ای سی ایل سے نکالنے کی منظوری دے دی۔

ذرائع کے مطابق وفاقی کابینہ نے 24 افراد کے نام ای سی ایل میں ڈالنے کی منظوری دے دی، کابینہ سے وزارت داخلہ کی سمری پر سرکولیشن کے ذریعے منظوری لی گئی۔

وفاقی کابینہ نے صحافی سمیع ابراہیم اور عمران ریاض کا نام ای سی ایل میں شامل کرنے کی منظوری دے دی، دونوں کا نام انکوائریوں کے باعث ای سی ایل میں شامل کرنے کی منظوری دی گئی۔

کابینہ نے پی ٹی آئی رہنما بابراعوان کانام ای سی ایل سے نکالنے کی منظوری دے دی، بابراعوان کا نام دسمبر 2023 میں القادرٹرسٹ کیس کے باعث ای سی ایل میں شامل کیا گیا تھا۔

وفاقی کابینہ نے مجموعی طور پر 22 مخلتف شخصیات کے نام ای سی ایل سے نکالنےکی منظوری دی۔

وفاقی کابینہ نے ذیلی کمیٹی برائے ای سی ایل کی سفارشات کی روشنی میں منظوری دی۔