کراچی : باپ کی بچوں کے ساتھ خود سوزی، جھلسنے والا آخری بچہ بھی دم توڑ گیا

واقعے میں جاں بحق افراد کی تعداد 4 ہوگئی، ریسکیو حکام

محمد رضا

اپ ڈیٹ 12 مارچ 2024 11:44am

پاکستان

کراچی کے علاقے نارتھ کراچی میں گزشتہ دنوں باپ کی بچوں کے ساتھ خود سوزی کے واقعے میں جھلسنے والا آخری بچہ بھی دم توڑ گیا۔

گزشتہ دنوں نارتھ کراچی میں باپ نے بچوں کے ساتھ خود سوزی کی تھی۔

واقعہ کے بعد جھلس کر زخمی ہونے والے افراد کو سول اسپتال کے برنس وارڈ منتقل کیا گیا تھا۔

واقعہ میں والد اور دو بچے پہلے ہی زخموں کی تاب نہ لاتے ہوئے دم توڑ گئے تھے تاہم اب جھلسنے والا 3 سالہ غلام حسین بھی دوران علاج چل بسا۔

ریسکیوحکام کے مطابق غلام حسین کے انتقال کے بعد جاں بحق افراد کی تعداد 4 ہوگئی۔

یاد رہے کہ 6 مارچ کو شہر قائد میں افسوسناک واقعہ پیش آیا تھا جہاں نیو کراچی فائیو سی فور گراؤنڈ میں عارف نامی شخص نے تین بچوں کے ساتھ خود کو آگ لگا لی تھی

جس کے بعد والد سول اسپتال کے برنس وارڈ میں دم توڑ گیا تھا جب کہ جھلس کر زخمی ہونے والے بچے زیر علاج تھے لیکن باپ کے بعد مزید دو بچوں کا انتقال ہوا اور اب تیسرا بچہ غلام حسین بھی دنیا سے رخصت ہوگیا۔

انتہائی قدم اٹھانے والا شہری عارف فروٹ کا ٹھیلا لگاتا تھا۔ بچوں کی والدہ کا انتقال ہو چکا تھا جب کہ عارف نے دوسری شادی کی تھی۔

یاد رہے کہ کراچی میں 23 جنوری کو بھی وائر لیس گیٹ کے پاس اسی طرح کا دلخراش واقعہ پیش آیا تھا، جہاں تھانہ ایئرپورٹ کی حدود میں فلک ناز اپارٹمنٹ کے رہائشی احسن رضا رضوی نے تین بچوں جبرائیل ، میکائیل اور بچی امہ ہانی اور اہلیہ ندا رضوی کی جان لے لی تھی۔

آپ تنہا نہیں، مدد دستیاب ہے

ذہنی دباؤ اور پریشانی آج کی تیز رفتار زندگی میں بہت عام ہے۔ مشکلات سے نمٹنے کیلئے ہر انسان کو سہارے، اچھے مشورے اور رہنمائی کی ضرورت ہوتی ہے۔ براہ کرم آپ ہیلپ لائن سے رابطہ کریں۔

اگر آپ اداس محسوس کر رہے ہیں۔ آپ تنگ ماحول میں کام کرنے کی وجہ سے تناؤ محسوس کر رہے ہیں۔
کسی بھی بیماری کی وجہ سے پریشانی محسوس کر رہے ہیں یا حال میں آپ کوئی ذہنی بیماری کی تشخیص ہوئی ہے۔
آپ کے ڈاکٹر نے آپ کو کونسلنگ لینے کا مشورہ دیا ہے، آپ محسوس کر رہے ہیں کہ آپ کیفیت کو کوئی نہیں سمجھ رہا ہے۔

آپ درج ذیل ہیلپ لائنز سے رابطہ کرسکتے ہیں اور ان سے بات کرسکتے ہیں۔

مائنڈ آرگنائزیشن: 35761999 042
امنگ: 4288665 0317
ٹاک ٹومی ڈاٹ پی کے: 4065139 0333
بات کرو: 5743344 0335
تسکین: 5267936 0332
روح: 3337664 0333
روزن: 22444 0800
اوپن کونسلنگ 35761999 042

یہاں یہ بات اہم ہے کہ آپ کو کیا کرنا چاہیے۔ اگر آپ کا کوئی جاننے والا فرد خودکشی کرنے کی کوشش کرتا ہے یا کسی بھی طرح کی علامات ظاہر کرتا ہے، تو براہ کرم درج ذیل ہدایات پرلازمی عمل کریں۔