انسداد دہشتگردی عدالت لاہور نے زمان پارک میں پولیس پر تشدد اور پیٹرول بم پھینکے اور عوام کو اکسانے کے مقدمہ میں صحافی عمران ریاض خان کی بعد از گرفتاری ضمانت کی درخواست پر ریکارڈ پیش نہ کرنے پر سماعت 9 مارچ تک ملتوی کردی۔

انسداد دہشت گردی عدالت کے جج ارشد جاوید چدھڑ نے درخواست پر سماعت کی۔

پراسیکیوشن نے مقدمہ کا ریکارڈ پیش نہیں کیا گیا، ملزم کے وکیل میاں علی اشفاق نے بتایا کہ پراسیکیوشن صحافی کو زیادہ سے زیادہ عرصہ کیلئے جیل میں رکھنا چاہتی ہے۔

عدالت نے پراسیکیوشن کو ریکارڈ پیش کرنے کا آخری موقع دیتے ہوئے 9 مارچ کو ریکارڈ پیش کرنے کا حکم دے دیا۔

صحافی عمران ریاض خان نے جیل سے ضمانت کی درخواست دائر کر رکھی ہے۔