الیکشن ٹربیونل کے فیصلوں کے خلاف بلوچستان ہائی کورٹ میں دائر آئینی درخواستوں کی سماعت کے دوران دو رکنی بنچ نے بی این پی کے سردار اختر جان مینگل کے خلاف دائر درخواست کو خارج کردیا جبکہ پیپلز پارٹی کے امیدوار جمال خان رئیسانی کو الیکشن کے لئے اہل قرار دے دیا۔

بلوچستان ہائی کورٹ میں الیکشن ٹربیونل کے منظور اور مسترد کئے جانے والے فیصلوں پر جسٹس روزی خان بڑیچ اور جسٹس اعجاز سواتی پر مشتمل بنچ نے سماعت کی۔

عدالت نے سردار اختر جان مینگل کے کاغذات نامزدگی منظور ہونے کے خلاف دائر اپیل کو خارج کردیا۔

دو رکنی بنچ نے پیپلز پارٹی کے حلقہ این اے 264 سے امیدوار جمال خان رئیسانی کو الیکشن لڑنے کی اجازت دیتے ہوئے الیکشن ٹربیونل کے فیصلے کو کالعدم قرار دے دیا۔ بلوچستان عوامی پارٹی کی این اے 263 سے امیدوار روبینہ عرفان کی الیکشن ٹربیونل کے خلاف دائر درخواست کو خارج کردیا۔

یاد رہے کہ گزشتہ روز بلوچستان نیشنل پارٹی (مینگل) کے سربراہ سردار اختر مینگل کے کاغذات نامزدگی کی منظوری کے خلاف درخواست پر بلوچستان ہائیکورٹ نے فیصلہ محفوظ کیا تھا۔

آئینی درخواست پر سماعت جسٹس روزی خان بڑیچ اور جسٹس اعجاز سواتی نے کی۔ درخواست گزار کے وکیل نے کہا تھا کہ سردار اختر مینگل ایف آئی آر میں نامزد ہیں۔