پیپلز پارٹی کی ٹکٹوں کی تقسیم پر لیاری کے بعد گھوٹکی میں بھی اختلافات سامنے آگئے ہیں اور قیادت پریشان ہوگئی ہے جس کے بعد اعلی سطحی وفد ناراض رہنما کے گھر بھیج دیا گیا ہے۔

گزشتہ روز بلاول ہاؤس کے قریب پیپلزپارٹی کے کارکنوں نے احتجاجی پلے کارڈ اٹھا کر عام انتخابات کے لئے ٹکٹس کی تقسیم کو غیرمنصفانہ قرار دیتے ہوئے مظاہرہ کیا تھا۔ اب لیاری کے بعد گھوٹکی میں بھی ٹکٹوں کی تقسیم پر اختلافات سامنے آگئے ہیں۔

ذرائع کے مطابق 2018 کے عام انتخابات میں اس وقت کے تحریک انصاف کے رہنما سردار شہریار شر نے پیپلزپارٹی کے جام مہتاب ڈھر کو صوبائی اسمبلی کے حلقہ پی پی 18 اوباڑو سے شکست دی تھی۔

ذرائع نے بتایا کہ پیپلزپارٹی کی قیادت 2018 میں پی ٹی آئی ٹکٹ پر کامیاب سردار شہریار شر کو ہی ٹکٹ دینا چاہتی ہے، جس پر پی پی سینیٹر ضد پر اڑ گئے ہیں اور انہوں نے آزاد امیدوار کی حیثیت سے الیکشن لڑنے کا فیصلہ کیا ہے۔

ذرائع نے بتایا کہ پیپلزپارٹی کے سینیٹر جام مہتاب ڈھر حلقہ پی ایس 18 اوباوڑو سے آزاد امیدوار ہیں، اور پارٹی قیادت پریشان ہے اور اس نے ایک اعلی سطحی وفد ناراض رہنما کے گھر بھیج دیا ہے، وفد میں مراد علی شاہ، خورشید شاہ، ناصر شاہ اور نثارکھوڑو شامل ہیں۔

ذرائع کا کہنا ہے کہ جام مہتاب نے دو ٹوک پیغام میں کہا ہے کہ میں ہر حال میں الیکشن لڑوں گا۔ تاہم وفد نے جام مہتاب کو جاتے ہوئے پیغام دیا کہ امید کرتے ہیں آپ پارٹی کے فیصلے کا احترام کریں گے۔

واضح رہے کہ شہریار شر کی پی پی میں شمولیت کے بعد جام مہتاب ڈہر کو سینیٹر بنایا گیا تھا۔