کراچی یونیورسٹی کے قریب سی ٹی ڈی اور ڈاکوؤں کے مابین مقابلے میں ایک ڈاکو ہلاک اور ایک زخمی حالت میں گرفتار کرلیا گیا۔

ترجمان سی ٹی ڈی کے مطابق جامعہ کراچی کے قریب سی ٹی ڈی سے مقابلے میں ایک ملزم ہلاک اور دوسرا زخمی حالت میں گرفتار کرلیا گیا۔ ہلاک ملزم کی شناخت حسیب اللہ کے نام سے ہوئی۔

ترجمان نے بتایا کہ ہلاک اور گرفتار ملزم بینکوں کے باہر لوٹ مار میں ملوث ہیں، ملزمان بینک سے رقم لے کر نکلنے والےشہریوں سے لوٹ مار کرتے تھے۔

ترجمان سی ٹی ڈی نے بتایا کہ ملزمان کی خبر ملنے پر ٹیم موقع پر پہنچی، تو ملزمان نے سی ٹی ڈی موبائل پرفائرنگ کردی، تاہم جوابی فائرنگ میں ایک ڈاکو موقع پر مارا گیا اور دوسرا بھی زخمی حالت میں گرفتار ہوگیا۔

ترجمان سی ٹی ڈی کے مطابق ہلاک ملزم کی لاش کو جناح اسپتال منتقل کردیا گیا، اور گرفتار ملزم کو تفتیش کے لیے سی ٹی ڈی سیل منتقل کیا جا رہا ہے۔