پاکستان تحریک انصاف (پی ٹی آئی) کی سوشل میڈیا ایکٹوسٹ صنم جاوید نے جیل سے الیکشن لڑنے کا اعلان کردیا۔

صنم جاوید کے والد جاوید اقبال نے میڈیا کو بتایا کہ وہ لاہور سے صوبائی اسمبلی کی نشست پی پی 150 سے کاغذات نامزدگی جمع کرائیں گی۔

والد نے بتایا کہ صنم جاوید مریم نواز کے مدمقابل ہوں گی۔

انہوں نے کہا کہ ’صنم جاوید 100 فیصد الیکشن لڑیں گی اور پارٹی نے بھی کنفرم کر دیا ہے کہ آپ کاغذات نامزدگی جمع کریں۔ صنم جاوید مریم نواز کے مقابلے میں الیکشن لڑیں گی۔‘

ان کا مزید کہنا تھا کہ صنم جاوید کے الیکشن میں حصہ لینے کے لیے متعلقہ دستاویزات اکٹھی کررہے ہیں، میں صنم جاوید کے کاغذات نامزدگی حاصل کروں گا۔

جاوید اقبال نے بتایا کہ صنم جاوید پی ٹی آئی کی ٹکٹ پر الیکشن لڑیں گی، اور خواتین کی مخصوص نشستوں پر بھی کاغذات نامزدگی جمع کروائیں گی۔

صنم کے والد کا کہنا تھا کہ میں چیف جسٹس آف پاکستان اور چیف الیکشن کمیشنر سے درخواست کرتا ہوں کہ مجھے صنم جاوید کے پاور آف اٹارنی پر دستخط کی اجازت دی جائے۔

جاوید اقبال کا کہنا تھا کہ میری بیٹی اس وقت بہت پاپولر ہے اور ہمیں جیت کی امید ہے۔