اسموگ کی صورتحال دوبارہ بگڑنے پر پنجاب حکومت نے لاہور میں ہفتے کے روز تعلیمی ادارے، سرکاری اور نجی دفاتر بند رکھنے کا اعلان کردیا۔

کابینہ کمیٹی برائے انسداد اسموگ کے اجلاس کے بعد پریس کانفرنس کرتے ہوئے نگراں وزیر اعلیٰ پنجاب محسن نقوی نے اعلان کیا کہ کسی کے روز گار کو متاثر نہیں کرنا چاہتے، اسموگ کے خاتمے کے لئے تاجر برادری تعاون کرے۔

انہوں نے کہا کہ ہوا کے رُخ کی وجہ سے اسموگ بڑھ سکتی ہے اور بارش کا امکان بھی نہیں، لاہور میں ہفتے کے روز تعلیمی ادارے، سرکاری اور نجی دفاتر بند رہیں گے، ہفتے کے روز مارکیٹیں دوپہر 3 بجے کے بعد کھلیں گی۔

محسن نقوی کا کہنا تھا کہ اسموگ پر قابو پانے کے لئے اعلیٰ اختیاراتی انوائر مینٹل کمیشن قائم کرنے کا فیصلہ کیا ہے۔ مصنوعی بارش برسانے کیلئے بہاؤ الدین ذکریا یونیورسٹی ملتان اور پنجاب یونیورسٹی کے ماہرین سے فوری رابطہ کر لیا گیا۔

نگراں وزیر اعلیٰ نے کہا کہ سرکاری سطح پر فیول والی موٹر سائیکل خریدنے پر پابندی لگائی جا رہی ہے، لہٰذا اب الیکٹرک بائیک ہی خریدی جائیں گی۔

محسن نقوی نے مزید کہا کہ لاہور سمیت تمام اضلاع میں غیر معیاری فیول کی چیکنگ تیز کر دی ہے، پاکستان میں 10 فیصد جب کہ بھارت میں 90 فیصد فصلوں کی باقیات جلائی جاتی ہیں، بھارت میں باقیات جلانے کی روک تھام پر کوئی کنٹرول نہیں جس کا ہم پر بُرا اثر پڑ رہا ہے۔