دوست نے ادھار رقم کی واپسی کا تقاضا کیا تو دوست نے اسے قتل کردیا اور موٹر سائیکل اور موبائل فون بھی لے کر فرار ہوگیا۔ ملزم عدنان نے مقتول دوست سے ایک لاکھ 20 ہزارروپے ادھار لے رکھے تھے۔

اوکاڑہ میں دوست نے ہی دوست کو فائرنگ کر کے قتل کر دیا، اور قاتل مقتول کا موٹرسائیکل، موبائل فون اور نقدی لے کر فرار ہوگیا۔

واقعے کی اطلاع ملتے ہی پولیس اور ریسکیو کی ٹیمیں جائے وقوعہ پر پہنچ گئیں اور لاش کو اسپتال منتقل کردیا۔

پولیس کے مطابق مقتول کی شناخت احمد حسن کے نام سے ہوئی ہے جو ڈسٹرکٹ اسپتال اوکاڑہ میں ڈسپنسر تھا۔

پولیس حکام نے بتایا کہ احمد حسن سے اس کے دوست عدنان نے ایک لاکھ 20 ہزارروپے ادھار لے رکھے تھے، جب احمد نے رقم کی واپسی کا تقاضا کیا تو ملزم عدنان نے اپنے ایک اور دوست زین کے ساتھ مل کر احمد کے قتل کا منصوبہ بنایا۔

پولیس کے مطابق احمد حسن کو عدنان اور زین بہانے سے لے کر گئے، اور ایک سنسان جگہ پر اسے فائرنگ کرکے قتل کردیا، اور مقتول کا موٹرسائیکل اور دیگر قیمتی سامان بھی لے گئے۔

ڈی پی او اوکاڑہ نے واقعے کا نوٹس لیتے ہوئے رپورٹ طلب کرلی ہے، جب کہ پولیس نے واقعے کا مقدمہ درج کرکے ملزمان کی تلاش شروع کردی ہے۔