جعفرآباد میں نہری پانی کی مصنوعی قلت کے خلاف ٹیل کے زمینداروں اور کاشتکاروں نے سندھ پنجاب اور بلوچستان کو ملانے والی قومی شاہراہ بلاک کردی، احتجاج کے باعث شاہراہ پرگاڑیوں کی لمبی قطاریں لگ گئیں۔

ٹیمپل شاخ کے زمینداروں نے غلام حسین بگٹی کی قیادت میں نہری پانی کی عدم فراہمی کےخلاف احتجاجاً سندھ، پنجاب اور بلوچستان کو ملانے والی قومی شاہراہ کو 4 گھنٹے تک بند رکھا۔

اس موقع پر مقررین کا کہنا تھا کہ پٹ فیڈر کینال میں وافر مقدارمیں پانی ہونے کے باوجود ہمیں پانی نہیں دیا جارہا، جس کے باعث ہزاروں ایکڑ پر کاشت کی گئی چاول کی فصل تباہی کے دہانے پر پہنچ چکی ہے۔

مقررین نے کہا کہ اگر زمینوں کو بروقت پانی نہ دیا گیا تو ہماری فصل ختم ہوجائے گی اور ہم معاشی تباہی کا شکار ہوجائیں گے، کیونکہ 2022 کے سیلاب سے ان کا پہلے ہی نقصان ہوا ہے۔

مظاہرین نے وزیراعلیٰ بلوچستان اور محکمہ ایری گیشن کے اعلیٰ حکام سے پانی کی فراہمی کا مطالبہ کیا۔