یوکرین کی وزارت داخلہ نے اطلاع دی ہے کہ یوکرین کے شمالی شہر چرنی ہیو پر روسی میزائل حملے میں ایک چھ سالہ بچے سمیت سات افراد ہلاک اور 90 زخمی ہوئے ہیں۔

وزارت داخلہ کی جانب سے جاری بیان میں کہا گیا کہ زخمی ہونے والوں میں بارہ بچے بھی شامل ہیں۔

ترجمان وزارت داخلہ کا کہنا ہے کہ متاثرین مذہبی تعطیل منانے کے لیے چرچ جا رہے تھے کہ انہیں میزائل سے نشانہ بنایا گیا۔

مبینہ طور پر حملے میں ایک مرکزی چوک، یونیورسٹی کی عمارت اور ایک تھیٹر کو نقصان پہنچا ہے۔

بی بی سی کے مطابق یوکرین صدر ولادیمیر زیلنسکی نے ایک مختصر ویڈیو پوسٹ کی جس میں تباہ شدہ کاریں اور چوک ملبے سے بھرا ہوا دکھایا گیا ہے۔ جبکہ ایک لاش بھی دیکھی جا سکتی ہے۔

مزید پڑھیں

قرآن کی بے حرمتی کرنیوالے پر چیچن صدر کے بیٹے کا حملہ

ایران کا آواز کی رفتار سے 15 گنا تیز ہائپر سونک میزائل بنانے کا دعویٰ

راجستھان میں بھارتی فوج کی مشق کے دوران غلطی سے میزائل فائر

چرنی ہیو بیلاروس کی سرحد کے قریب واقع ایک شہر ہے جس کا روس نے حملے کے آغاز میں محاصرہ کر لیا تھا۔

صدر زیلینسکی نے ٹیلی گرام پر پوسٹ کرتے ہوئے لکھا، ’ایک روسی میزائل شہر کے عین وسط میں، ہمارے چرنی ہیو میں گرا۔ جس سے ایک چوک، پولی ٹیکنیک یونیورسٹی اور ایک تھیٹر کو نقصان پہنچا۔‘

دوسری جانب روس نے دعویٰ کیا ہے کہ یوکرین کے ایک ڈرون نے شمال مغربی نوگوروڈ علاقے میں ایک فوجی ہوائی اڈے کو نشانہ بنایا، جس سے ہوائی اڈے پر آگ لگ گئی۔

روس کی جانب سے جاری بیان میں مزید کہا گیا کہ ایک طیارے کو نقصان پہنچا لیکن کوئی جانی نقصان نہیں ہوا۔

یوکرین نے مبینہ ڈرون حملے پر کوئی تبصرہ نہیں کیا ہے۔

کیف کی فضائیہ کا کہنا ہے کہ یوکرین کی فوج نے رات بھر کی گئی کارروائی میں ماسکو کی طرف سے شروع کیے گئے 17 ایرانی ساختہ ڈرونز میں سے 15 کو مار گرایا۔