وزیراعظم شہباز شریف نے کہا ہےکہ ڈنمارک میں عراقی سفارتخانے کے سامنے قرآن مجید کی بے حرمتی سے جذبات مجروح ہوئے، اربوں مسلمانوں کے جذبات مجروح کرنے کی اجازت نہیں دے سکتے۔

وزیراعظم شہبازشریف نے ڈنمارک واقعے سے متعلق ٹویٹ میں لکھا کہ عراقی سفارتخانے کے سامنے قرآن مجید کی بےحرمتی سے مسلمانوں کے جذبات مجروح ہوئے، پاکستان میں بھی واقعے پرانتہائی تشویش ہے اور درد محسوس کررہے ہیں۔

شہباز شریف کا کہنا تھا کہ تسلسل کے ساتھ نفرت آمیز اور گھناؤنے واقعات کے پیچھے منفی حکمت عملی پوشیدہ ہے، مذہبی ہم آہنگی کو نقصان پہنچانے کے ساتھ اسلامو فوبیا کو فروغ دیا جارہا ہے۔

انھوں نے کہا کہ مختلف حکومتوں اور عقائد کے رہنماؤں سے اس سلسلے کے خاتمے کیلئے بات کروں گا، مٹھی بھر بہکے لوگوں کو اربوں مسلمانوں کےجذبات مجروح کرنے کی اجازت نہیں دے سکتے۔

وزیراعظم شہباز شریف کا کہنا ہے کہ منفی عزائم رکھنے والے چند لوگوں کا ایجنڈا کسی صورت پروان نہیں چڑھنے دیں گے۔