خادم الحرمین الشریفین شاہ سلمان بن عبدالعزیز کی جانب سے غلافِ کعبہ تبدیل کرنے کی منظوری دے دی گئی ہے، جس کے بعد اللہ تعالیٰ کے گھر کا غلاف تبدیل کرنے کی روح پرور تقریب کل یکم محرم الحرام کی شب اٹھارہ جولائی کو منعقد کی جائے گی۔

مکہ مکرمہ میں کسوہ فیکٹری میں غلاف کعبہ کی تیاری کا عمل سال بھر جاری رہتا ہے، جس کو درجنوں ماہر کاریگر دس مراحل میں تیار کرتے ہیں۔

خالص ریشم کے دھاگوں سے بننے والے غلاف کعبہ کو تیار کرنے کے بعد اس پر سنہرے دھاگوں سمیت سونے اور چاندی کی تاروں کی مدد سے آیات قرآنی کو خوبصورتی کے ساتھ کنندہ کیا جاتا ہے۔

کسوہ فیکٹری کی انتظامیہ کے مطابق غلافِ کعبہ کی تیاری کے لیے 120 کلو گرام سونا، 100 کلو گرام چاندی اور 670 کلو ریشم استعمال کیا گیا ہے۔

خادم الحرمین الشریفین شاہ سلمان کے شاہی فرمان کے مطابق غلاف کعبہ یکم الحرام کی شب 18 جولائی کو تبدیل کیا جائے گا، جس کے لئے کسوہ فیکٹری کے ماہرین کے علاوہ پندرہ افراد کو غلاف کعبہ کی تبدیلی کے لئے خصوصی تربیت دی گئی ہے۔

غلاف کعبہ کی روح پرور تقریب کل رات نماز عشاء کے بعد منعقد کی جائے گی۔