سابق ایم این اے سردار محمد خان لغاری اور سابق ایم پی اے نیلم حیات ملک نے پی ٹی آئی سے لاتعلقی کا اعلان کر دیا۔

9 مئی کے واقعات کے بعد پی ٹی آئی کے 100 سے زائد رہنما تحریک انصاف کو خیرباد کہہ چکے ہیں، اور یہ سلسلہ تاحال جاری ہے، آج پی ٹی آئی کے سابق ایم این اے سردار محمد خان لغاری نے بھی پارٹی سے راہیں جدا کرلی ہیں۔

سردار محمد خان لغاری این اے 192 ڈی جی خان سے قومی اسمبلی کے امیدوار ہیں، انہوں نے 2018 کا الیکشن اسی حلقے میں پی ٹی آئی کے ٹکٹ پر لڑا تھا اور اپنے مدمقابل شہبازشریف کو ہرایا تھا۔

سردار محمد خان لغاری نے 9 مئی کے واقعات پر تنقید کرتے ہوئے پی ٹی آئی چھوڑنے کا فیصلہ کیا اور اپنے ویڈیو بیان میں فوجی تنصیبات پر حملے اور شہداء کی بے حرمتی کی مذمت کی۔

دوسری جانب تحریک انصاف کی سابق ایم پی اے نیلم حیات ملک نے بھی پارٹی سے لاتعلقی کا اعلان کر دیا ہے۔ اور 9 مئی واقعات کی شدید الفاط میں مذمت کی۔

نیلم حیات ملک کا کہنا تھا کہ توڑ پھوڑ کی سیاست پر یقین نہیں رکھتی، پی ٹی آئی لاہور کی قیادت نے جناح ہاوس پر دھاوا بولنے پرعوام کو اکسایا، پرتشدد واقعات کی جتنی مذمت کی جائے کم ہے۔