پاکستان تحریک انصاف (پی ٹی آئی) نے محمد عباس جعفری کی بنیادی رکنیت معطل کردی، سیکریٹری جنرل عمر ایوب کے دستخط سے باضابطہ نوٹیفکیشن جاری کردیا گیا۔

پی ٹی آئی نوٹیفکیشن کے مطابق میڈیا کے مختلف فورمز پر آپ کی پریس کانفرنس کی گردش اور بڑے پیمانے پر نشریات دیکھی گئی کہ آپ نے پاکستان تحریک انصاف چھوڑ دی ہے۔

نوٹیفکیشن میں کہا گیا کہ آپ نے جان بوجھ کر پارٹی دفاتر اور پارٹی کی بنیادی رکنیت سے استعفیٰ دینے کا اعلان کیا لہذا، آپ کو پاکستان تحریک انصاف کی بنیادی رکنیت ختم کرنے کا نوٹس دیا جاتا ہے۔

نوٹس میں مزید لکھا گیا کہ پاکستان تحریک انصاف سے آپ کی رکنیت فوری طور پر ختم کر دی گئی ہے، آپ کو ہدایت کی جاتی ہے کہ پارٹی کا نام، عہدہ یا رکنیت کا کسی بھی طریقے سے استعمال کرنے سے گریز کریں، ناکامی کی صورت میں پارٹی آپ کے خلاف قانونی کارروائی کریگی۔

یاد رہے کہ محمد عباس جعفری کا تعلق فیشن انڈسٹری سے ہے اور وہ بحیثیت ماڈل کئی ایوارڈز بھی اپنے نام کرچکے ہیں جبکہ 2018 میں وہ پی ٹی آئی کے ٹکٹ پر رکن سندھ اسمبلی بھی منتخب ہوئے تھے۔