استحکام پاکستان پارٹی کے سربراہ جہانگیر ترین کے بھائی عالمگیر ترین نے خودکشی کرلی۔

خاندانی ذرائع کے مطابق عالمگیر ترین نے پستول سے اپنے سر میں گولی ماری۔

عالمگیر ترین کی پوسٹ مارٹم رپورٹ سامنے آگئی

عالمگیر ترین خان کی پوسٹ مارٹم رپورٹ مکمل ہوگئی ہے اور ”آج نیوز“ نے پوسٹ مارٹم حاصل کرلی ہے۔

رپورٹ میں بتایا گیا ہے کہ عالمگیر ترین کی دائیں کنپٹی پر ایک گولی لگی، کنپٹی پر لگنےوالی گولی آرپار ہوئی جس سے ان کی موت واقع ہوئی۔

رپورٹ میں یہ بھی بتایا گیا ہے کہ عالمگیر ترین کے جسم کے اندرونی تمام حصے تندرست ہیں، گولی لگنے سے کھوپڑی فریکچر ہوئی جو موت کا سبب بنی، جسم پر تشدد کے کوئی نشانات موجود نہیں۔

رپورٹ کے مطابق موت زیادہ خون بہہ جانے کے باعث بھی واقع ہوئی، گولی لگنے سے دماغ کے ٹشو بری طرح متاثر ہوئے، گولی دائیں جانب لگ کر بائیں جانب سے پار ہوئی۔

ملازم نے کیا دیکھا

ذرائع کے مطابق عالمگیر ترین رات کو معمول کے مطابق اپنے بیڈ روم گئے، صبح 10بجے تک نہ اٹھے تو ملازم نے دروازہ کھٹکھٹایا، ملازم نے کھڑی سے جھانکا تو وہ بیڈ پر خون میں لت پت پڑے تھے، ملازم نے فوری طور پر جہانگیر خان ترین کو فون کیا۔

ملازم کے آگاہ کرنے پر جہانگیر ترین فوری جائے وقوعہ پر پہنچے، ڈاکٹر نے چیک کیا تو پتا چلا گولی مار کرخود کشی کی گئی ہے۔

ذرائع کا کہنا ہے کہ عالمگیر ترین نے کب خود کشی کی اس کا تعین پوسٹمارٹم کے بعد ہوگا۔

جہانگیر ترین کو بھائی کی خودکشی کی خبر پارٹی اجلاس کے دوران ملی۔ جہانگیر ترین اور عبدالعلیم خان، عالمگیرترین کی رہائش گاہ پر موجود تھے۔

ایڈیشنل آئی جی سی ٹی ڈی بھی عالمگیر ترین کی رہائش گاہ پہنچے۔

ابتدائی تفتیش

پولیس ذرائع کا کہنا ہے عالمگیر ترین لاہور کے علاقے گلبرگ میں واقع اپنے اپارٹمنٹ میں موجود تھے، وہاں سے اطلاع ملنے پر پولیس پہنچی۔

ابتدائی تفتیش کے مطابق کمرے سے گولی کا ایک خول ملا ہے، سر کے دائیں طرف گولی کا نشان موجود ہے۔

تفتیش میں معلوم ہوا کہ عالمگیر ترین نے صبح 6 سے 7 بجے کے درمیان خودکشی کی۔

پولیس ذرائع کے مطابق عالمگیر ترین کی لاش فلیٹ کے کمرہ نمبر 3 سے ملی ہے، لاش کے پاس پستول موجود تھا اور ان کے 2 ملازم فلیٹ میں موجود نہیں تھے۔

عالمگیر کا آخری نوٹ

پولیس حکام کے مطابق عالمگیر ترین نے خودکشی سے قبل ایک تحریر بھی چھوڑی ہے جس میں انہوں نے اپنی بیماری کا ذکر کیا ہے۔

عالمگیر ترین کا تحریر شدہ خط ایک صحفہ پر مشتمل تھا، خط پر تحریر عالمگیر ترین کی ہی ہے، جس میں انہوں نے کہا ہے کہ بیماری سے تنگ آکر خودکشی کررہا ہوں۔

پولیس کے مطابق عالمگیر ترین نے اپنے لائسنس شدہ پستول سے خودکشی کی، پولیس نے خط اور پستول فرانزک کیلئے بھجوا دیا ہے۔

عالمگیر ترین کی ڈیڈ باڈی کو اسپتال روانہ کر دیا گیا ہے، اسپتال میں ان کا پوسٹ مارٹم متوقع ہے۔

جہانگیر ترین بھی ڈیڈ باڈی کے ہمراہ اسپتال روانہ ہوئے۔

عالمگیر ترین غیر شادی شدہ تھے، ان کی عمر 63 سال تھی، ان کی منگنی ہوئی تھی اور وہ دسمبر میں شادی کرنے جا رہے تھے۔

عالمگیر کی نماز جنازہ

عالمگیر ترین کی نماز جنازہ آج رات ساڑھے 10 بجے ماڈل ٹاؤن اے بلاک مسجد میں ادا کی جائے گی۔