کراچی کے علاقے نارتھ ناظم آباد پیپلز چورنگی کے قریب گھر میں گیس سلنڈر کا دھماکا ہوا ہے۔

نارتھ ناظم آباد بلاک این کے بنگلے میں قائم کمپیوٹر پارٹس ویئر ہاؤس میں زور دار سلنڈر دھماکا ہوا۔ پولیس کے مطابق دھماکے سے ویئر ہاؤس کی چھت اور دیوار گرگئی اور آگ بھڑک اٹھی۔

فائربریگیڈ کی ایک فائر ٹینڈر نے آگ پر قابو پایا۔ دھماکے کے باعث ویئرہاؤس سے متصل دیگر بنگلوں کو بھی جزوی نقصان پہنچا۔

ملبے تلے دب کر ویئرہاؤس کا چوکیدار سلمان حنیف جاں بحق ہوگیا۔ چوکیدار لیاقت آباد کا رہائشی اور چار بچوں کا باپ تھا۔

بم ڈسپوزل اسکواڈ کا کہنا ہے کہ دھماکا ویئرہاؤس میں گیس بھرجانے اور شارٹ سرکٹ کی وجہ سے ہوا۔ کمپنی ورکرز کے مطابق آگ سے اے سی کے کمپریسر پھٹ گئے، ویئرہاؤس میں آئن لائن سیل کے لئے سامان رکھا ہوا تھا۔