پاکستان میں ذی الحج کا چاند نظر آگیا جبکہ ملک بھر میں عیدالضحیٰ 29 جون بروز جمعرات کو ہوگی۔

ذوالحج کا چاند دیکھنے کے لیے مرکزی رویت ہلال کمیٹی کا اجلاس کراچی میں محکمہ موسمیات کے دفتر میں ہوا، جس کی صدارت مولانا عبدالخبیر آزاد نے کی۔

اجلاس میں وزارت مذہبی امور، سپارکو اور محکمہ موسمیات کے نمائندے شریک ہوئے، اس کے علاوہ وزارت سائنس و ٹیکنالوجی کے نمائندے بھی چاند دیکھنے کے لیے اجلاس میں شریک ہوئے۔

اسلام آباد، لاہور، پشاور سمیت دیگر علاقوں میں بھی زونل کمیٹیوں کے اجلاس ہوئے۔

مرکزی رویت ہلال کمیٹی کے اجلاس میں ملک بھر سے چاند نظر آنے یا نہ آنے کی شہادتوں کا جائزہ لیا گیا تاہم ملک کے مختلف حصوں سے شہادتیں موصول ہونے پر مولانا عبدالخبیر آزاد نے اعلان کیا کہ ذی الحجہ کا چاند نظر آگیا۔

انہوں نے کہا کہ پاکستان کے بیشتر مقام پر مطلع صاف اور ابر آلود رہا، اسلام آباد، لاہور، خانپور، بہاولنگر اور کراچی میں ذی الحج کا چاند دیکھا گیا، اتفاق رائے سے فیصلہ کیا گیا کہ یکم ذی الحج 1444 ہجری 20 جون (کل) بروز منگل کو ہوگی جبکہ عید الاضحیٰ 29 جون بروز جمعرات کو ہوگی۔

اس سے قبل محکمہ موسمیات کا کہنا تھا کہ آج چاند نظر آنے کے قوی امکانات ہیں، غروب آفتاب کے وقت چاند کی عمر 34 گھنٹے 13 منٹ ہوگی۔

خیال رہے کہ گزشتہ روز سعودی عرب میں ذوالحج کا چاند نظر آگیا، مناسک حج کا رکن اعظم 9 ذی الحج یعنی 27 جون کو ہوگا۔

ذی الحج کا چاند نظرآںے کے بعد سعودی عرب میں عیدالاضحی 28 جون بروز بدھ کو ہوگی۔