سابق وزیراعظم عمران خان کے سابق پرنسپل سیکرٹری اعظم خان لاپتہ ہو گئے ہیں، اور تھانہ کوہسار میں ان کی گمشدگی کا مقدمہ درج کرلیا گیا ہے۔

سابق وزیراعظم عمران خان کے پرنسپل سیکرٹری اعظم خان لاپتہ ہو گئے ہیں، اور ان کے اہلخانہ کی جانب سے تھانہ کوہسار میں درخواست بھی دے دی گئی ہے۔

درخواست اعظم خان کے بھتیجے کی طرف سے دی گئی ہے، جس میں بتایا گیا ہے کہ اعظم خان کل شام کو گھر سے نکلنے کے بعد واپس نہیں آئے، اور ان کا موبائل نمبر بھی بند ہے۔

دوسری جانب پولیس حکام کا کہنا ہے کہ اعظم خان کے لاپتہ ہونے کے حوالے سے تفتیش جاری ہے، جب کہ تھانہ کوہسار میں ان کی گمشدگی کا مقدمہ درج کرلیا گیا ہے۔

نیب نے لاپتہ اعظم خان کو 19جون کو طلب کرلیا

دوسری جانب نیب نے نیشنل کرائم ایجنسی 190 ملین پاؤنڈ کیس میں سابق پرنسپل سیکرٹری اعظم خان کو 19جون کو طلب کرلیا ہے، اور اس حوالے سے نوٹس بھی جاری کیا ہے۔

نیب کے نوٹس میں کہا گیا ہے کہ اعظم خان نیب کی ٹیم کے سامنے 19 جون صبح 10 بجے پیش ہوں۔ نوٹس میں سابق پرنسپل سیکرٹری کو کیس سے متعلق دستاویزات بھی ہمراہ لانے کی ہدایت کی گئی ہے۔