قبائلی رہنما اور سابق رکن قومی اسمبلی شاہ جی گل آفریدی نے پاکستان مسلم لیگ (ن) میں شمولیت اختیار کرلی۔

اسلام آباد میں مسلم لیگ ن کے سینئر رہنما امیرمقام کے ہمراہ پریس کانفرنس میں شاہ جی گل آفریدی نے لیگی قیادت پر اعتماد کا اظہار کیا۔

انھوں نے کہا کہ نواز شریف نے پاکستان کو ٹی آئی آر کا ممبر بنایا، میاں صاحب جانتے تھے ہمارا مستقبل سینٹرل ایشیا ہے، ملک کو مہنگائی سے وزیراعظم شہباز شریف اور انکی ٹیم نکالے گی، کسی کے ملک توڑ نے کا خواب پورا نہیں ہو گا۔

انجینئر امیر مقام نے شاہ گل آفریدی کو پارٹی میں خوش آمدید کہتے ہوئے کہا کہ مسلم لیگ ن ملک کو ترقی کی طرف لے کر جارہی ہے، شاہ گل آفریدی کے ساتھ مل کر خیبرپختونخوا میں بھی ترقیاتی کام کروائیں گے۔

لیگی رہنما مرتضیٰ جاوید نے کہا کہ ن لیگ خیبرپختونخوا کیلئے خوشی کا دن ہے، ن لیگ میں شمولیت اختیار کرنے والوں کو خوش آمدید کہتے ہیں۔ شاہ گل آفریدی کی شمولیت کے پی کی سیاست میں تبدیلی کا پیش خیمہ ثابت ہوگی۔