پنجاب کے ضلع گجرات کے علاقے سرائے عالمگیر میں مذہبی جماعت کے مارچ کو روکنے کیلئے مین جی ٹی روڈ پر خندقیں کھودنا شروع کردی گئیں۔

مذہبی جماعت کے مارچ کو روکنے کے لئے انتظامیہ نے مین جی ٹی روڈ پر خندقیں کھودنا شروع کردیں۔ دریائے جہلم پل سمیت جی ٹی روڈ کو کنٹینرز لگا کر ہر قسم کی ٹریفک کیلئے بند کردیا گیا۔

راستوں کی بندش کی وجہ سے ایمبولینس میں اسپتال جانے والے مریضوں کو مشکلات کا سامنا ہے، جی ٹی روڈ کی بندش سے شہریوں کے ساتھ ٹرانسپورٹرز بھی پریشان ہیں۔

سرائے عالمگیر میں ٹرانسپورٹرز نے دریائے جہلم پل سمیت جی ٹی روڈ پر کنٹینرز لگانے کے معاملے پر اعلیٰ حکام سے نوٹس لینے کا مطالبہ کیا ہے۔

پل بند ہونے سے جی ٹی روڈ سے ائیرپورٹ ، جہلم، دینہ، سوہاوہ، چکوال، گوجر خان، راولپنڈی اور اسلام آباد جانے والے افراد کے لئے بذریعہ سڑک جانا ممکن نہیں رہا۔