محکمہ موسمیات نے آئندہ دو روز میں ملک کے بیشتر علاقوں میں گرمی میں شدت کی پیشگوئی کردی۔

ملک میں جاری گرمی کی لہر اور لوڈ شیڈنگ نے پہلے ہی عوام کو پریشان کررکھا ہے، پنجاب، سندھ اور بلوچستان کے میدانی علاقوں کا درجہ حرارت مسلسل بڑھ رہا ہے، اسلام آباد میں بھی سورج آنکھیں دکھا رہا ہے، اور میدانی علاقوں میں درجہ حرارت 45 ڈگری تک پہنچ گیا۔۔ اب دوسری جانب محکمہ موسمیات نے بیشتر اضلاع میں گرمی کی شدت میں مزید اضافے کا خدشہ ظاہر کیا ہے۔

محکمہ موسمیات کے مطابق اگلے ایک سے دو دن کے دوران ملک کے بیشتر میدانی علاقوں میں دن کے درجہ حرارت معمول سے 02 سے 04 ڈگری سینٹی گریڈ زیادہ رہنے کا امکان ہے۔

محکمہ موسمیات کا کہنا ہے کہ آئندہ دو روز میں سندھ، پنجاب اور بلوچستان میں موسم گرم اور خشک رہے گا، تاہم دن کے اوقات میں گردآلود ہوائیں اور جھکڑ چلنے کا امکان ہے، جب کہ خیبرپختونخوا کے شمالی علاقوں میں موسم قدرے بہتر رہے گا، اور بعض مقامات پر ٹھنڈی ہواؤں کا راج رہے گا، اور کشمیر اور گلگت بلتستان میں مطلع جزوی ابرآلود رہے گا۔

محکمہ موسمیات کے مطابق گزشتہ روز سب سے زیادہ گرمی دادو، جیک آباد میں پڑی جہاں درجہ حرارت 48 ڈگری سینٹی گریڈ ریکارڈ کیا گیا، جبکہ سبی میں 47 رہا۔ محکمہ موسمیات نے گرمی کی شدت کے باعث شہریوں کو احتیاطی تدابیر اپنانے کی ہدایت کی ہے۔

محکمہ موسمیات کا کہنا ہے کہ کراچی میں موسم گرم اورمرطوب رہے گا، شہرمیں جنوب مغرب کی سمت سے ہوا 22 کلو میٹر فی گھنٹہ کی رفتارسےچل رہی ہے اور ہوا میں نمی کاتناسب58 فیصد ہے، شہر کا زیادہ سے زیادہ درجہ حرارت 34 اور کم سے کم 28 ڈگری سینٹی گریڈ ریکارڈ کیا گیا۔