پیپلزپارٹی نے سابق ایڈمنسٹریٹر کراچی مرتضی وہاب کو میئر کراچی بنانے کا فیصلہ کرلیا۔

ذرائع کے مطابق پیپلزپارٹی نے میئرکراچی بنانے کے لئے قیادت سے مشاورت مکمل کرلی ہے، اور میئر کراچی کے لئے قرعہ سابق ایڈمنسٹریٹرکراچی مرتضیٰ وہاب کے نام نکلا ہے۔

ذرائع کا کہنا ہے کہ چیئرمین پیپلزپارٹی بلاول بھٹونے اس حوالے سے اپنی پھوپھو اور آصف زرداری کی ہمشیرہ فریال تالپور اور وزیراعلیٰ سندھ مراد علی شاہ سے مشاورت کی، جس کے بعد مرتضیٰ وہاب کے نام کی منظوری دی گئی۔

ذرائع نے بتایا کہ پیپلزپارٹی نے کاشف شورو کو حیدرآباد کا میئر بنانے کا بھی فیصلہ کرلیا ہے۔

دوسری جانب رہنما پیپلز پارٹی نثار کھوڑو کا کہنا ہے کہ میئر، ڈپٹی میئر، چیئرمین اور وائس چیئرمین کا نام فائنل نہیں ہوا، پارٹی تاحال امیدواروں کے ناموں پر غور کر رہی ہے۔

نثار کھوڑو نے کہا کہ میڈیا میں چلنے والے ناموں میں کوئی صداقت نہیں، ناموں سے متعلق مشاورت جاری ہے اور حتمی فیصلے کے بعد باضابطہ طور پر آگاہ کیا جائے گا۔