وزیرتوانائی سندھ امتیاز شیخ نے گیس میٹر رینٹ پر اضافے کا فیصلہ مسترد کرتے ہوئے کہا ہے کہ اوگرا میں بیٹھے بابوٶں کی من مانیاں ناقابل برداشت ہوچکی ہیں۔

ایک بیان امتیاز شیخ نے کہا کہ سندھ حکومت اس فیصلے کے خلاف وفاق کو اپنے تحفظات سے آگاہ کرے گی، یہ غریب عوام کے ساتھ نا انصافی ہے۔

انھوں نے کہا کہ میٹررینٹ کے ساتھ فکسڈ چارجز زیادہ گیس استعمال کرنے والوں پر ہی لاگو ہوتا ہے، وفاقی ادارے گیس کی تقسیم کے معاملے پرآرٹیکل ایک سو اٹھاون پرعملدرآمد نہیں کررہے۔

صوبائی وزیر کا کہنا تھا کہ سب سے زیادہ قدرتی گیس پیدا کرنے والا صوبہ سندھ گیس سے محروم ہے، وزیراعظم فوری طورپر اوگرا کے من مانے فیصلوں کا نوٹس لیں۔

امتیاز شیخ نے کہا کہ وزیراعظم سے درخواست ہے کہ سوئی سدرن کو میٹر رینٹ پر اضافے کا فیصلہ فوری واپس لینے کے احکامات صادر کیے جائیں۔