لاہور: پاکستان تحریک انصاف نے آزاد کشمیر قانون ساز اسمبلی میں حزبِ اختلاف کی نشستوں پر بیھٹنے کا فیصلہ کر لیا۔

زمان پارک لاہور میں چیئرمین تحریک انصاف عمران خان کی زیر صدارت اجلاس میں آزاد جموں و کشمیر قانون ساز اسمبلی کے حوالے سے اہم فیصلے کر لئے گئے۔

تحریک انصاف نے آزاد جموں و کشمیر قانون ساز اسمبلی میں حزبِ اختلاف کی نشستوں پر بیٹھنے کا فیصلہ کرتے ہوئے خواجہ فاروق کو قائدِ حزبِ اختلاف نامزد کر دیا ہے۔

عمران خان نے خواجہ فاروق کو پارلیمانی پارٹی کا اجلاس فوری طلب کرنے کی ہدایات کرتے ہوئے کہا کہ خواجہ فاروق کے طلب کردہ پارلیمانی پارٹی کے اجلاس میں شرکت کرنے والے اراکین ہی کو پارٹی کا حصہ شمار کیا جائے گا۔

عمران خان نے کہا کہ آزاد کشمیر کے پارلیمانی پارٹی اجلاس سے کنارہ کشی کرنے والے اراکین کے خلاف تحریک انصاف سے اخراج کی کارروائی شروع کی جائے گی۔

پی ٹی آئی اجلاس میں فیصلہ کیا گیا کہ سابق وزیراعظم عبدالقیوم نیازی تحریک انصاف آزاد جموں و کشمیر کے صدر ہوں گے، جنہیں ریاست میں تنظیم سازی کا عمل جلد مکمل کرنے کی ہدایت کی گئی ہے۔

پارٹی کے اجلاس میں فیصلہ ہوا کہ پارٹی نظم و ضبط کی خلاف ورزی کرنے والے اراکینِ کے اخراج کے بعد حلقوں کی سطح پر امیدواروں کے تعین کا عمل بھی مکمل کیا جائے گا۔