وزیراعظم شہبازشریف نے سپریم کورٹ کے سینئر ترین جسٹس قاضی فائز عیسیٰ کے خلاف کیوریٹیو ریویو ریفرنس واپس لینے کا حکم دے دیا۔

پی ٹی آئی کے دور حکومت میں سپریم کورٹ کے سینئر ترین جج جسٹس قاضی فائز عیسیٰ کے خلاف کمزور اور بے بنیاد وجوہات پر ریفرنس دائر ہوا تھا، تاہم موجودہ حکومت نے اس کی پیروی نہ کرنے کا فیصلہ کیا ہے۔

اس حوالے سے وزیراعظم شہباز شریف کا بڑا فیصلہ سامنے آیا ہے، اور انہوں نے سپریم کورٹ کے سینئر ترین جسٹس قاضی فائز عیسیٰ کے خلاف کیوریٹیو ریویو ریفرنس واپس لینے کا حکم دے دیا ہے۔

وزیراعظم کی زیر صدارت کابینہ پہلے ہی اس فیصلے کی منظوری دے چکی ہے، اب وزیراعظم نے وزیر قانون سینیٹر اعظم نزیر تارڑ کو جسٹس قاضی فائز عیسیٰ کے خلاف ریفرنس واپس لینے کی ہدایت کر دی ہے۔

ذرائع کے مطابق حکومت نے کیس میں قابل اصلاح نظرثانی واپس لینے کی سمری بھجوا دی ہے۔ وزارت قانون نے سمری صدر مملکت کو ارسال کردی ہے۔

وزیراعظم شہبازشریف کا کہنا ہے کہ کہ ریفرنس کے نام پر جسٹس قاضی فائز عیسیٰ اور ان کے اہل خانہ کو ہراساں اور بدنام کیا گیا، یہ ریفرنس نہیں تھا، آئین اور قانون کی راہ پر چلنے والے ایک منصف مزاج جج کے خلاف عمران نیازی کی انتقامی کارروائی تھی۔

وزیراعظم کا کہنا تھا کہ جسٹس فائز عیسیٰ کے خلاف ریفرنس عدلیہ کی آزادی پر شب خون اور اسے تقسیم کرنے کی مذموم سازش تھی، عمران نیازی نے صدر کے آئینی منصب کا اس مجرمانہ فعل کے لئے ناجائز استعمال کیا، اور صدر عارف علوی عدلیہ پر حملے کے جرم میں آلہ کار اور ایک جھوٹ کے حصہ دار بنے۔