کوئٹہ میں ترکیہ اور کابل کے شیف کے تیار کردہ کھانوں میں ایسا ذائقہ ہے کہ جو کھاتا ہے ایک بار اور مانگتا ہے بار بار۔

کوئٹہ کے کھانوں میں افغان تکہ ،چوپان کباب ، قبرغہ چانپ، کباب روش اور کابلی پلاؤ اپنے ذائقے کی وجہ سے ہر دلعزیز ہیں۔

گوشت کے شوقین افراد کے لیے کوئٹہ کھانوں کی جنت کہلاتا ہے۔ تازہ مٹن اور بیف کا اصل ذائقہ روایتی روش اور کابلی پلاؤ میں ہی ملتا ہے۔ چٹ پٹا مصالحہ نہ ہونے سے معدے کی تیزابیت اور دیگر بیماریوں سے انسان محفوظ رہتا ہے۔

کوئٹہ شہر اپنے لذیذ پکوان اور کھانے کے شوقین لوگوں کی وجہ سے بھی جانا جاتا ہے یہاں کے کھانے کی خاص بات مصالحہ کم اور گوشت کا اصل ذائقہ ہے۔

کوئٹہ کے کھانے کے لیے پاکستان بھر سے لوگ آتے ہیں ایسے میں روایتی ماحول بھی مل جائے تو کیا ہی بات ہے۔

روایتی کھانوں کی وجہ سے کچھ ریسٹورنٹ لوگوں کی توجہ کا مرکز بنے ہوئے ہیں افغان تکہ، چوپان کباب، قبرغہ چانپ، کباب روش اور کابلی پلاؤ اپنے لذیذ ذائقے کی وجہ سے پیٹ بھر کر نوش کیے جاتے ہیں۔

اسپیشل پلیٹر میں مٹن بیف چکن اور دنبے کے گوشت کے ساتھ تکہ بوٹی بھی شامل کی جاتی ہے اس لئے لوگوں کا من پسند ہے اور جب اسے ڈرائی فروٹ اور سلاد کے ساتھ پیش کیا جاتا ہے تو کھانے کا مزہ دوبالا ہوجاتا ہے۔

ذائقہ دار کھانوں کی تیاری کے لیے شیف کابل اور ترکی سے بلائے جاتے ہیں۔ عوام کا کہنا ہے کہ کوئٹہ کے کھانے کا ذائقہ ایسا ہے جو ایک بار کھائے اور بار بار منگوائے۔