اسلام آباد میں فاٹا ”کل قبائل“ فورم کے تحت احتجاجی مظاہرہ کیا گیا جس میں انتخابات سے پہلے مردم شماری مکمل کرنے کا مطالبہ کیا گیا۔

فاٹا سے تعلق رکھنے والے قبائلی شہریوں نے اسلام آباد پریس کلب کے باہراحتجاج کیا۔ مظاہرین نے پریس کلب سے ڈی چوک تک احتجاجی ریلی نکالی۔

رکن قومی اسمبلی مولانا جمال الدین اور فورم کے جنرل سیکرٹری احمد سعید نے کہا کہ ہمارے حقوق پر ڈاکا ڈالا جا رہا ہے، قباعلی علاقوں میں مردم شماری پہلے کرائی جائے اس کے بعد الیکشن کا انعقاد کیا جائے۔

انھوں نے کہا کہ نئی مردم شماری کے بغیرانتخابات منظور نہیں کرسکتے، مطالبات منظور نہیں کئے گئے تو لاکھوں لوگ الیکشن کمیشن کے سامنے احتجاج کریں گے۔

مقررین نے مطالبہ کیا کہ مردم شماری کی بنیاد پرحلقہ بندی کی جائے، مطالبات کی منظوری تک احتجاج کا سلسلہ جاری رہے گا۔ کل فاٹا قبائل کی جانب سے وفد نے الیکشن کمیشن میں یاد داشت بھی پیش کی۔