کوئٹہ گلیڈی ایٹرز کے خلاف ملتان سلطانز کے اوپنر عثمان خان نے اپنی ہی ٹیم کے کھلاڑی رائیلی روسو کی تیز ترین سنچری کا ریکارڈ توڑ کر اپنے نام کرلیا ہے۔

پاکستان سپر لیگ ( پی ایس ایل ) ایٹ کے 28 ویں میچ میں بھی چھکوں اور چوکوں کی برسات اور تیز ترین سنچری کے ریکارڈ سے شائقین خوب لطف اندوز ہوئے۔

ملتان سلطانز کے عثمان خان نے پی ایس ایل تاریخ کی تیز ترین سنچری داغ دی۔ کوئٹہ کے خلاف جارحانہ بیٹنگ کرتے ہوئے اوپنر عثمان خان نے 36 گیندوں پر سنچری اسکور کی۔

جارح مزاج بلے باز عثمان خان نے ریکارڈ سنچری بنانے کےلئے کوئٹہ کے بالرز کو 7 چھکے اور 11 چوکے لگائے۔

عثمان خان نے اپنے ہی ٹیم میٹ رائیلی روسو سے پی ایس ایل کی تیز ترین سنچری کا ریکارڈ چھین کر اپنے نام کرلیا۔ رائیلی روسو نے ایک روز قبل 41 گیندوں پر سنچری بنائی تھی۔

عثمان خان نے اپنی دلکش اننگ میں وکٹ کے چاروں جانب شاٹ لگائے۔ اوپننگ بلے باز کے پاور فل اسٹاکس کو کوئٹہ کے فیلڈرز دیکھتے ہی رہ گئے۔

نوجوان بیٹر اپنی دلیرانہ اننگ میں کوئٹہ کے کسی بالرز کو خاطر میں نہ لائے اور ہر جانب آزادانہ اسٹاکس لگاکر میچ دیکھنے کےلئے راولپنڈی اسٹیڈیم آنے والے شائقین کو خوب لطف اندوز کیا۔

ملتان کے اوپنر عثمان خان 43 گیندوں پر 120 رنز بناکر آؤٹ ہوئے، اپنی خوبصورت اننگ میں عثمان نے مجوعی طور پر 9 چھکے اور 12 چوکے لگائے۔ محمد نواز نے انھیں آؤٹ کیا۔