ملک میں مہنگائی کا جن بے قابو ہونے لگا ہے، ایسے میں سوئی سدرن نے گیس کی قیمت بڑھانے کے لئے اوگرا میں درخواست دائر کردی ہے۔

ملکی معیشت پر اۤئی ایم ایف اور ڈالر کی بڑھتی قیمتوں کے دباؤ سے اشیائے خورونوش کے ساتھ خدمات پہنچانے والے اداروں نے بھی ریٹ بڑھانے کےلئے پر تول لیے ہیں۔

سوئی سدرن نے اوگرا سے گیس مزید مہنگی کرنے کی درخواست کردی ہے۔ سوئی سدرن نے اوگرا میں دائر درخواست میں مؤقف اپنایا ہے کہ گیس کی بنیادی قیمت میں 391 روپے 69 پیسے فی یونٹ اضافہ کیا جائے۔

اوگرا ذرائع کے مطابق سوئی سدرن کی جانب سے قیمتیں بڑھانے کی درخواست آئندہ مالی سال کی ریونیو ضروریات پورا کرنے کیلئے دی گئی ہے۔ اوگرا سوئی سدرن کی درخواست پر13مارچ کو سماعت کرے گا۔