سابق وفاقی وزیر شیخ رشید احمد نے کہا ہے کہ اگر صدرعارف علوی کی بات نہ مانی گئی تو ملک میں آئینی بحران پیدا ہوجائے گا اور ملک بند گلی میں چلا جائے گا، جس کے بعد آخری فیصلہ سپریم کورٹ کے کندھوں پر ہوگا۔

سماجی رابطے کی ویب سائیٹ پر ٹوئیٹ کرتےہوئے انھوں نے کہا کہ صدر مملکت کا فیصلہ آئینی اورقانونی ہے، پنجاب اور خیبرپختون خوا میں 9 اپریل کو الیکشن کروانے ہوں گے، ورنہ گھمبیر اور سنگین حالات پیدا ہو جائیں گے۔

ماہر قانون اور تحریک انصاف کےرہنما فیصل چوہدری نے کہا ہے کہ صدر ڈاکٹر عارف علوی کی جانب سے پنجاب اور خیبرپختون خوا میں ضمنی الیکشن کی تاریخ دینےکے اقدام میں آئینی جھول نظرنہیں آیا۔

فیصل چوہدری نےمیڈیا سےگفتگو میں کہا کہ صدرمملکت آئین کے مطابق ذمہ داری پوری کررہے ہیں، انھوں نے ضمنی الیکشن سے متعلق الیکشن کمیشن کوخط لکھا، الیکشن کمیشن نے بھی جوابی خط ارسال کیا جس سےمشاورت مکمل ہوگئی۔ صدر کےاعلان کےبعدالیکشن کمیشن انتخابات کرانےکا پابند ہے

انھوں نے کہا کہ پی ٹی آئی بھی صدرکے ہراقدام کے ساتھ کھڑی ہے، حکومت عدالت گئی توعدالت خود صدر کے فیصلے کے ساتھ کھڑی ہوگی۔ الیکشن کمیشن نے کچھ کیا تو آئین کی خلاف ورزی کامرتکب ہوگا۔

حکمراں اتحاد پی ڈی ایم کو اۤڑے ہاتھوں لیتےہوئےفیصل چوہدری کا کہنا تھا کہ موجودہ حکومت غیرقانونی طریقے سے وجود میں آئی۔

پاکستان تحریک انصاف(پی ٹی اۤئی) کے رہنما جمشید چیمہ نے بھی میڈیا سےبات چیت میں کہا کہ صدر مملکت ڈاکٹر عارف علوی نے انتخابات کی تاریخ دینے کا آئینی و قانونی حق استعمال کیا،ان کی جانب سے پنجاب اور خیبرپختون خوا میں انتخابات کی تاریخ دینے کے اعلان کا خیر مقدم کرتےہیں۔

مسرت جمشید چیمہ کا کہنا تھا کہ الیکشن کمیشن ، پنجاب اور خیبرپختون خوا کے گورنرز نے ضمنی انتخابات کی تاریخ نہ دے کر آئین سے واضح انحراف کیا ہے

انھوں نےکہا کہ حکمران ٹولے نے شکست کے خوف سے آئین کو پائوں تلے روندنے سے بھی گریز نہیں کیا، تحریک انصاف دھونس ، جبر ، دھمکیوں کے باوجود اپنی آئینی و قانونی جدوجہد سے دستبردار نہیں ہو گی،عوام پی ڈی ایم ٹولے کو گھسیٹتے ہوئے بیلٹ باکس تک لے کر جائینگے۔