پاکستان تحریک انصاف کے رہنما خیال احمد کاسترو نے پنجاب کی صوبائی کابینہ کا حلف اٹھا لیا۔

گورنر پنجاب بلیغ الرحمان نے گورنر ہاؤس میں خیال احمد سے حلف لیا۔

اس موقع پر وزیراعلیٰ پنجاب چودھری پرویز الہٰی گورنر ہاؤس پہنچے اور خیال احمد کاسترو کو وزارت کا حلف اٹھانے پر مبارکباد دی اور نیک تمناؤں کا اظہار بھی کیا۔

وزیراعلیٰ پنجاب نے کہا کہ امید ہے خیال احمد کاسترو نئی ذمہ داریوں کو بطریق احسن نبھائیں گے اور عوام کی خدمت کیلئے دن رات ایک کریں گے۔

دوسری جانب پی ٹی آئی چئیرمین عمران خان نے فیصل آباد سے تعلق رکھنے والے ارکان اسمبلی کے مشاورتی اجلاس میں خیال احمد کے وزیر بننے پر لاعلمی کا اظہار کرتے ہوئے کہا کہ مجھے علم نہیں تھا کہ آپ وزیر بن رہے ہیں، آپ کے وزیر بننے سے ہمارے بیانیے کو نقصان پہنچا۔

تاہم، میڈیا سے گفتگو میں صوبائی وزیر خیال کاسترو کا کہنا تھا کہ میں عمران خان کا سپاہی ہوں اور عمران خان کے علم میں ہے کہ میں نے صوبائی وزیر کا حلف اٹھایا۔

انہوں نے کہا کہ عمران خان کل کہیں گے تو اسمبلیاں تحلیل کر دی جائیں گی، اب تک اسمبلیاں تحلیل کرنے کے تاریخ 20 دسمبر ہے۔