سیہون شریف کے قریب انڈس ہائی وے پر وین کے کھائی میں گرنے سے جاں بحق ہونے والوں کی تعداد 21 ہوگئی ہے۔ جبکہ حادثے کے حوالے سے انکشاف ہوا ہے کہ یہ انڈس ہائی وے پر کٹ لگائے جانے کے سبب پیش آیا۔ کٹ سیلابی پانی کے اخراج کے لیے لگایا گیا تھا۔

سیہون ٹول پلازہ کے قریب بچل چنہ کے مقام پر جمعرات اور جمعہ کی درمیانی شب ایک تیز رفتار مسافر وین انڈس ہائی وے روڈ کے مقام پر سڑک سے نیچے جا گری۔ ابتدائی اطلاعات میں کہا گیا تھا کہ وین کھائی میں گری ہے۔ تاہم بعد میں معلوم ہوا کہ یہ پانی کے اخراج کے لیے لگایا گیا کٹ تھا۔ حادثے کے وقت یہاں پر سیلابی پانی موجود تھا۔

اس پانی میں گرنے کے بعد خیرپور سے سیہون کی جانب جانے والی مسافر وین کے مسافر ڈوب گئے۔ بیشتر ہلاکتیں ڈوبنے سے ہوئیں۔

جاں بحق افراد کا تعلق خیرپور سے تھا۔ بیس لاشوں کو عبداللہ شاہ اسٹی ٹیوٹ آف میڈیکل ہیلتھ اینڈ سائنسس منتقل کردیا گیا۔

جاں بحق افراد میں 13 بچے اور 8 خواتین شامل ہیں، جاں بحق بچوں کی عمریں 10 سے 15سال کے درمیان ہیں۔

”آج نیوز“ کے نمائندے قربانی علی بھٹی کے مطابق حادثے کے بعد اگلی صبح نیشنل ہائی وے اتھارٹی کے حکام نے حادثے کے مقام پر چار بورڈ لگا دیئے جن میں متبادل راستے کی نشاندہی کی گئی ہے اور وارننگ دی گئی ہے۔ تاہم جمعرات کی شب یہ بورڈ موجود نہیں تھے۔

حادثے میں فوت ہونیوالے تمام افراد پھلپوٹا برادری سے تعلق رکھتے ہیں جو لال شہباز قلندر کی درگاہ پر جا رہے تھے۔

حادثے کے مقام پر کچھ عرصہ پہلے تک 30 سے 40 فٹ چوڑا کٹ موجود تھا جسے کنکریٹ سے بھر دیا گیا تھا لیکن اب کٹ 200 فٹ تک بڑھ گیا ہے جس کی گہرائی تقریبا 12 فٹ تک ہوگئی ہے۔

اس مقام پر انڈس ہائی وے کے ایک ٹریک کو نیشنل ہائی وے اتھارٹی کی جانب سے کنکریٹ اور پتھر ڈال کر عام ٹریفک کے لیے فعال کیا گیا تھا، لیکن دوسرے ٹریک پر لگے کٹ کو اب تک نہ بھرا گیا ہے اور نہ ہی اس روڈ پر حادثے سے قبل کسی قسم کی سائن بورڈز نصب کیے گئے تھے۔

مقامی ڈرائیور اور باقاعدگی سے یہاں سے گزرے والے کار سوار اس کٹ سے آگاہ ہیں تاہم خیرپورمیرس سے سیہون آنے والے مسافر وین کا ڈرائیور اس سے لاعلم تھا۔ تیزرفتاری اور رات کے اندھیرے میں دکھائی نہ دینے کے باعث گاڑی اس کٹ میں نیچے جا گری۔

یاد رہے کہ انڈس ہائی وے کو اکتوبر کے وسط میں معمول کے مطابق ٹریفک کے لیے بحال کیا گیا تھا۔ قبل ازیں، سہون کی مختلف یونین کونسلوں سے سیلابی پانی کو دریائے سندھ کی طرف جانے کی اجازت دینے کے لیے ہائی وے پر 30 انچ چوڑا کٹ لگایا گیا تھا۔

جاں بحق ہونیوالے 20 افراد کی نمازہ جنازہ جمعہ کو ان کے آبائی علاقے میں ادا کردی گئی۔ نمازہ جنازہ میں لوگوں کی بڑی تعداد نے شرکت کی۔