تحریک انصاف نے توشہ خانہ کے حوالے سے تمام الزامات مسترد کرتے ہوئے کہا کہ تحائف سے متعلق سب کچھ قانون کے مطابق کیا، عمر ظہور کے خلاف دبئی اور ایک میڈیا گروپ کے خلاف لندن میں قانونی کارروائی کا اعلان بھی کر دیا۔

اسلام آباد میں پارٹی کے دیگر رہنماوں کے ہمراہ پریس کانفرنس کرتے ہوئے فواد چوہدری نے توشہ خانہ سے متعلق نئے الزمات کو یکسر مسترد کر دیا، کہا عمر ظہور کا نام ای سی ایل سے ہٹایا گیا جس کے ایک ماہ بعد اس کا ویڈیو پیغام آ گیا، ہم عمر ظہور کے خلاف دبئی اور ایک میڈیا گروپ کے خلاف لندن میں قانونی کارروائی کریں گے۔

ان کا کہنا تھاکہ لاکھوں لوگ راولپنڈی میں سیاسی اجتماع کرینگے، پھر اسلام آباد کا رخ کیا جائے گا۔

شیریں مزاری نے سوالات اٹھائے کہ کس نے ارشد شریف کو دبئی سے نکالا اور وہ کیوں کینیا گیا؟ عمر ظہور کا نام کس نے ای سی ایل سے نکالا؟

اس موقع پر زلفی بخاری کا کہنا تھا مجھے اس ڈیلر کا سب کچھ پتہ ہے، جلد حقائق سامنے لائیں گے، بغیر کسی رسید یا کاغذ کے کیسے فروخت کیا جا سکتا ہے، اصل حقائق اور مقاصد ہم جلد سامنے لائیں گے۔