وزیراعظم شہباز شریف کا پریشان کن معاشی اعشاریوں پر تشویش کا اظہار، آج پھر معاشی ٹیم سے بریفنگ لی جس کے بعد ہنگامی بنیادوں پر معیشت کی بہتری کیلئے اصلاحات کا جامع لائحہ عمل تیار کرنے کی ہدایات جاری کر دی۔

تفصیلات کے مطابق وزیرِ اعظم شہباز شریف کی زیرِ صدارت ملکی معیشت کی موجودہ صورتحال پر اعلیٰ سطحی اجلاس ہوا، جس میں شاہد خاقان عباسی، احسن اقبال، مفتاح اسماعیل، مریم اورنگزیب،زبیرعمر،عائشہ غوث پاشا اور متعلقہ اعلی افسران نے شرکت کی۔

اجلاس میں وزارتِ خزانہ کی طرف سے موجودہ ملکی معیشت کی صورتحال سے تفصیلی طور پر آگاہ کیا گیا۔

وزیرِاعظم نے اجلاس سے خطاب کرتے ہوئے کہا کہ حکومت پاکستان کو معاشی لحاظ سے مستحکم بنانے کیلئے ہنگامی اقدامات اٹھانے جا رہی ہے۔

انہوں نے معاشی ٹیم کو ہر صورت عام آدمی کی معاشی حالت بہتر کرنے کیلئے اقدمات اٹھانے کی ہدایت کی۔

وزیراعظم کی جانب سے مجموعی معاشی صورتحال کی بہتری کے ساتھ ساتھ مہنگائی پر قابو پانے کیلئے بھی ترجیحی بنیادوں پر اقدامات کرنے کی ہدایت کی گئی ہے ۔