اسلام آباد: گورنر سندھ عمران اسماعیل نے ناظم جوکھیو قتل کیس کے مرکزی ملزم پی پی ایم این اے جام عبدالکریم کا نام پی این آئی ایل میں شامل کرنے کے لیے ڈائریکٹر جنرل ایف آئی اے کو خط لکھ دیا۔

ایف آئی اے کو لکھے گئے خط میں گورنر سندھ نے کہا کہ جام عبدالکریم، ناظم جوکھیو کے قتل کیس میں نامزد ہیں اور بیرون ملک سے پاکستان واپس آنے کا منصوبہ بنا رہے ہیں۔

انہوں نے ڈی جی سے کہا کہ وہ جام کریم کا نام پی این آئی ایل میں شامل کریں تاکہ وزیراعظم عمران خان کے خلاف تحریک عدم اعتماد کے دوران ووٹ دینے کے بعد انہیں ملک سے فرار ہونے سے روکا جا سکے۔

اس سے قبل وزیر داخلہ شیخ رشید احمد نے پی پی ایم این اے جام عبدالکریم کو واپس آنے پر گرفتار کرنے کا اعلان کیا، جن پر ناظم جوکھیو کے قتل کا مقدمہ درج ہے۔