صدر مملکت ڈاکٹر عارف علوی اور وزیراعظم عمران خان نے یوم پاکستان کے موقع پر اپنے الگ الگ پیغامات میں کہا ہے کہ وہ دن دور نہیں جب پاکستان معاشی طور پر مضبوط اور خوشحال ملک بنے گا۔

ریڈیو پاکستان کے مطابق اپنے پیغام میں صدر مملکت نے کہا کہ برصغیر کے مسلمانوں کے لیے علیحدہ وطن کا مطالبہ وقت کے ساتھ سیاسی طور پر درست ثابت ہوا ہے۔

صدر مملکت ڈاکٹر عارف علوی نے کہا کہ بھارت کے غیر قانونی طور پر مقبوضہ جموں و کشمیر میں انسانی حقوق کی خلاف ورزیاں اور بھارت میں اقلیتوں پر ظلم و ستم یہ یقین کرنے کے لیے کافی ہیں۔

انہوں نے کہا کہ اُس وقت کی مسلم قیادت نے واضح طور پر تصور کیا تھا کہ اگر مسلمان غیر منقسم ہندوستان میں ہندو اکثریت کے رحم و کرم پر رہیں تو ان کے لیے کیا ہوگا۔

وزیراعظم عمران خان کا پیٖغام

اپنے پیغام میں وزیراعظم عمران خان نے قائداعظم محمد علی جناح کے دیے گئے اتحاد، ایمان اور نظم و ضبط کے اصولوں پر عمل پیرا ہونے پر زور دیا۔

عمران خان نے کہا کہ ریاست مدینہ کے ماڈل پر ایک حقیقی جمہوری فلاحی ریاست کے طور پر پاکستان کی ترقی کے لیے خود کو وقف کرنا ہے۔

انہوں نے کہا کہ موجودہ حکومت نے غربت کے خاتمے اور انصاف کے فروغ کے لیے طویل المدتی اصلاحات اور اقدامات کیے ہیں۔

وزیر اعظم نے کہا کہ حکومت کی توجہ معاشرے کے پسماندہ طبقات پر مرکوز ہے تاکہ انہیں مساوی مواقع فراہم کیے جاسکیں۔