اسلام آباد: پیپلزپارٹی کے چیئرمین بلاول بھٹو زرداری نے کہا ہے کہ وزیراعظم عمران خان تحریک عدم اعتماد سے بھاگ رہے ہیں کیونکہ انہیں اپنی شکست کا شروع سے ہی علم تھا۔

اسلام آباد میں پریس کانفرنس کرتے ہوئے بلاول بھٹو نے کہا کہ کپتان جو جانتا ہے کہ وہ جیتنے والا ہے وہ کبھی کھیل سے نہیں بھاگتا۔

چیئرمین پی پی نے کہا کہ 'قومی اسمبلی کے اسپیکر نے ریکوزیشن کی منظوری کے 14 دن بعد بھی اجلاس نہیں کیا۔

انہوں نے کہا کہ پاکستان کا آئین کہتا ہے کہ قومی اسمبلی کے اسپیکر کو 14 دن بعد اجلاس بلانا چاہیے۔

بلاول بھٹو زرداری نے کہا کہ قواعد کے مطابق تحریک عدم اعتماد پر ووٹنگ اس کے جمع ہونے کے سات دن بعد اسی طرح ہونی چاہیے جس طرح شہید بے نظیر بھٹو کے دور میں ہوئی تھی۔

انہوں نے کہا کہ وزیراعظم تحریک سے بھاگ رہے ہیں لیکن ہم انہیں اپنے ملک کے مستقبل سے کھیلنے کی اجازت نہیں دیں گے۔

انہوں نے وزیر اعظم کو تنقید کا نشانہ بناتے ہوئے کہا کہ انہوں نے آئین پاکستان کی خلاف ورزی کی ہے، اور یہ کہ قومی اسمبلی کے اسپیکر قواعد پر عمل کرنے میں ناکام رہے۔

بلاول نے کہا کہ بار کونسل نے سپریم کورٹ میں ایک درخواست پیش کی ہے جس میں سیاسی جماعتوں کے نام شامل نہیں تھے، تاہم چیف جسٹس آف پاکستان نے پھر بھی ہمیں نوٹس جاری کیا۔

انہوں نے مزید کہا کہ حکومت خود کو آئین، قوانین اور قواعد سے بالاتر سمجھتی ہے، تاہم، ملک میں ایک ادارہ ہے جو ہمارے آئینی حقوق، جمہوری حقوق، ہمارے ووٹوں اور اراکین پارلیمنٹ کے تحفظ کے لیے تیار ہے۔

انہوں نے کہا کہ وہ وزیراعظم کے ’پروپیگنڈے‘ کو بے نقاب کریں گے۔

ان کا کہنا تھا کہ وزیراعظم عمران خان کے پاس اپوزیشن کے خلاف غلط کام کرنے کا کوئی ثبوت نہیں ہے اس لیے وہ پروپیگنڈا پر مبنی مہم چلا رہے ہیں۔