اسلام آباد: پاکستان مسلم لیگ ن کے سینئر رہنما احسن اقبال نے کہا ہے کہ پاکستان تحریک انصاف کو ان ممالک سے غیر قانونی اور غیر آئینی فنڈنگ ملی جو پاکستان کے دشمن ہیں۔

اسلام آباد میں میڈیا سے گفتگو کرتے ہوئے انہوں نے کہا کہ الیکشن کمیشن کو پی ٹی آئی کے خلاف غیر ملکی فنڈنگ کیس میں تمام ثبوت فراہم کر دیے گئے ہیں۔

انہوں نے امید ظاہر کی کہ الیکشن کمیشن سات سال سے زیر التواء فارن فنڈنگ کیس میں جلد اپنا فیصلہ سنائے گا۔

انہوں نے کہا کہ آپ اپنی چوری کیلئے قوم کے سامنے جوابدہ ہیں۔

انہوں نے مزید کہا کہ عمران خان کے خلاف پارلیمنٹ میں تحریک عدم اعتماد کے بعد انہیں وزارت عظمیٰ سے ہٹا دیا جائے گا۔

وزیر اعظم عمران خان کی اپوزیشن کے خلاف تقریر کی مذمت کرتے ہوئے مسلم لیگ ن کے رہنما نے کہا کہ عمران خان نے ثابت کر دیا کہ وہ کسی علاقے کا کونسلر منتخب ہونے کے بھی قابل نہیں ہیں۔