اسلام آباد:نیشنل کمانڈ اینڈ آپریشن سینٹر (این سی او سی) نے تعلیمی اداروں میں موسم سرما کی تعطیلات 3 جنوری سے کرنےکااعلان کردیا ۔

وفاقی وزیر برائے منصوبہ بندی اسد عمر کی زیرصدارت نیشنل کمانڈ اینڈ آپریشن سینٹر (این سی او سی ) کا اجلاس ہوا، جس میں وفاقی وزیر تعلیم شفقت محمود، ڈاکٹر فیصل سلطان اور دیگر شریک ہوئے۔

اجلاس میں موسم سرما کی تعطیلات کو ری شیڈول کرنے کا معاملہ زیر غور آیا۔

این سی او سی نے تعلیمی اداروں میں تعطیلات سے متعلق اعلان کرتےہوئے کہا کہ ملک بھر کے تعلیمی اداروں میں موسم سرما کی تعطیلات آئندہ سال 3 جنوری سے ہوں گی،وفاقی تعلیمی اداروں میں 3 سے 9 جنوری تک تعطیلات ہوں گی جبکہ دھند والے علاقوں میں تعطیلات کا فیصلہ صوبائی حکومتیں خود کریں گی۔

این سی او سی کا کہنا تھا کہ نیا ویرینٹ اومی کرون تیزی سے دنیا میں پھیل رہا ہے،اسی تناظر میں موسم سرما کی تعطیلات کو ری شیڈول کیا گیا ہے، تعطیلات ری شیڈول کرنے کا مقصد زیادہ سے زیادہ طلبا و طالبات کو کووڈ ویکسین لگانا ہے، اسکول کھلے رکھنے سے لاکھوں اسٹوڈنٹس کووڈ ویکسین سے مستفید ہو سکیں گے،والدین اپنے بچوں کو جلد از جلد کووڈ سے بچاو کی ویکسین لگوائیں۔