ڈھاکا: بنگلادیش کرکٹ ٹیم کے اسٹار آل راؤنڈر شکیب الحسن فِٹ ہوکر پاکستان کیخلاف دوسرے ٹیسٹ میچ کیلئے قومی اسکواڈ میں شامل ہوگئے۔

شکیب الحسن ٹی 20 ورلڈکپ میں ہیمسٹرنگ انجری کے باعث پاکستان کیخلاف ٹی 20سیریز اور پہلے ٹیسٹ نہیں کھیل سکے تھے۔

رپورٹس کے مطابق شکیب الحسن نے پیر کے روز اپنا فٹنس ٹیسٹ پاس کرلیا جس کے بعد وہ پاکستان کیخلاف دوسرے ٹیسٹ میچ کیلئے بنگلادیش کے 20 رکنی اسکواڈ کا حصہ بن گئے ہیں۔

اس کے علاوہ فاسٹ بولر تسکین احمدجو انگلی میں انجری کے باعث پہلا ٹیسٹ نہیں کھیل سکے تھے ان کی بھی اسکواڈ میں واپسی ہوئی ہے۔

واضح رہے کہ پاکستان نے بنگلادیش کو 2 ٹیسٹ میچز پر مشتمل سریز کے پہلے میچ میں منگل کو 8 وکٹوں سے شکست دے دی جبکہ سیریز کا دوسرا ٹیسٹ 4 دسمبر سے ڈھاکا میں شروع ہوگا۔