باجوڑ کی تحصیل خار کے علاقے راغگان ڈیم میں سیکیورٹی پر مامور پولیس اہلکاروں کو دیسی ساختہ دھماکا خیز مواد (آئی ای ڈی) کا نشانہ بنایا گیا، جس کے نتیجے میں دو اہلکار شہید ہوگئے۔

ایس ایچ او قابل شاہ کے مطابق دھماکے کی شدت اور آواز سے دور دور تک خوف و ہراس پھیل گیا۔

ڈی پی او عبدالصمد خان کے مطابق دھماکے کے بعد پولیس اور فورسز کی ٹیمیں جائے وقوعہ پر پہنچ گئیں اور پورے علاقے کو گھیرے میں لے کر سرچ آپریشن شروع کردیا گیا، جبکہ لاشوں کو اسپتال منتقل کردیا گیا ہے۔

شہید ہونے والے اہلکاروں کی شناخت کانسٹیبل عبدالحیان اور کانسٹیبل سراج کے نام سے ہوئی ہے۔ واقعے کی فوری تحقیقات شروع کردی گئی ہیں۔