اسلام آباد:شہباز شریف اور قائم علی شاہ پھر مشکل میں آگئے، وفاقی حکومت نے مسلم لیگ ن کے صدر شہباز شریف اور سابق وزیراعلیٰ سندھ قائم علی شاہ کے نام ایگزٹ کنٹرول لسٹ (ای سی ایل )میں ڈال دئیے،کرپشن،منی لانڈرنگ اور آمدن سے زائد اثاثے کے کیسز کے باعث دونوں کے نام ای سی ایل میں ڈالے گئے۔

ذرائع کے مطابق وفاقی کابینہ نے قومی اسمبلی میں قائد حزب اختلاف شہباز شریف اور سابق وزیراعلیٰ سندھ قائم علی شاہ کے نام ای سی ایل میں ڈالنے کی سمری کی منظوری سرکولیشن کے ذریعے دی۔

ذرائع کا کہنا ہے کہ شہباز شریف اور قائم علی شاہ کے نام مختلف کیسز کی وجہ سے ای سی ایل میں ڈالے گئے۔

قائم علی شاہ کیخلاف سندھ روشن پروگرام میں کرپشن کا کیسزنیب میں ہے جبکہ شہباز شریف پر آمدن سے زائد اثاثے اور منی لانڈرنگ کے الزامات ہیں، سپریم کورٹ کے حکم پر دونوں کے نام ای سی ایل میں ڈالے گئے۔

واضح رہے کہ کوفاقی کابینہ نے چند روز پہلے سمری سرکولیشن کے ذریعے منظوری دی تھی، وفاقی کابینہ کی منظوری کے بعد وزارت داخلہ نے شہباز شریف اور قائم علی شاہ کے نام ای سی ایل میں ڈال دئیے۔

شہباز شریف کا نام ای سی ایل میں ڈالناعمران صاحب کی ترجیح ہے، مریم اورنگزیب

دوسری جانب سماجی رابطے کی ویب سائٹ ٹوئٹر پر اپنے ٹویٹ میں مسلم لیگ (ن)کی ترجمان مریم اورنگزیب نے شہباز شریف کا نام ای سی ایل میں ڈالے جانے پر ردعمل دیتے ہوئے کہا ہے کہ شہباز شریف کا نام ای سی ایل میں ڈالنا عمران صاحب کی ترجیح ہے، عمران خان کی ترجیح مہنگائی اور معیشت ٹھیک کرنا نہیں۔

شہباز شریف کا نام ECL پر ڈالنا عمران صاحب کی ترجیح ہے،مہنگائی اور معیشت ٹھیک کرنا نہیں .ایک نہیں، دو نہیں، تین چار دفعہ ECL پر ڈالو اور آٹا، چینی،بجلی،گیس،دوائی مافیاز اور اپنے ATMs کو آرڈینس لا کر NRO دیں عمران صاحب باتیں نہ کریں،اپنے نمبرز پورے کریں۔#باتیںنہکرونمبرپورےکرو pic.twitter.com/msjJZJNuCJ

— Marriyum Aurangzeb (@MarriyumA) November 12, 2021

مریم اورنگزیب نے ٹویٹ میں مزید لکھاکہ شہبازشریف کا نام ایک نہیں، 2نہیں، تین چار دفعہ ای سی ایل میں ڈالیں، عمران خان آٹا، چینی، بجلی، گیس اور دوائی مافیا کو آرڈیننس لاکر این آر او دیں۔